फेसबुकमा पछ्याउनुहोस्
विष्णु गौडेल,मध्यविन्दु(नवलपरासी),१५ पुस,(रासस)
नारायणगढ–बुटवल सडक खण्ड अन्तर्गत दाउन्नेमा सोमबार बिहान देखि अवरुद्ध रहेको सडक अझै सञ्चालनमा आउन सकेको छैन । केही दिन देखिको सित लहरले दाउन्नेमा सडक चिप्लो र हिलो हुँदा सडक चिप्लो तथा हिलाम्य बनेपछि राजमार्ग नै अवरुद्ध भएको हो । दाउन्ने स्थित खुर्सानी खोला आसपासको सडकमा सवारी साधन चिप्लिने र उकालो चढ्न नसक्ने समस्या देखिएपछि सोमबार बिहान देखि नै राजमार्गमा लामो सवारी जाम लागेको छ ।
जिल्ला ट्राफिक प्रहरी कार्यालय नवलपरासी(बर्दघाट सुस्तापूर्व)का सूचना अधिकारी प्रहरी वरिष्ठ नायब निरीक्षक विनोद जोशीका अनुसार सवारी साधनको जाम बिस्तारै हटाउने प्रयास भइरहेको छ । तर बाक्लो हुस्सु र चिप्लो सडकका कारण सवारी सञ्चालनमा अत्यधिक कठिनाइ भइरहेको उहाँले बताउनु भयो । जोशीका अनुसार दाउन्नेबाट दुम्कीबास जङ्गलसम्म करिब १५ सय सवारी साधन जाममा फसेका छन् ।
नारायणगढ–बुटवल सडक खण्ड योजना पश्चिम खण्डका सूचना अधिकारी इन्जिनियर विकास खनालले निर्माणाधीन क्षेत्रमा शीतलहरको प्रभाव अझ बढी परेको जानकारी दिनुभयो ।
“सडक निर्माण भइरहेको स्थानमा बाटो हिलो बनेपछि दाउन्नेको उकालो चढ्न सवारी साधनलाई गाह्रो भएको छ”,उहाँले भन्नु भयो,“हाल खुर्सानी खोला क्षेत्रमा ग्राभेल हाल्ने काम भइरहेको र अवस्था सहज नहुँदासम्म मालवाहक सवारीलाई बर्दघाट र भुताहा क्षेत्रमा रोकेर राखिएको छ ।”
हिजो बाट सुरु भएको जाम अहिले सम्म पनि कायमै रहँदा यात्रुहरू अलपत्र परेको विनयी त्रिवेणी गाउँपालिकाका अध्यक्ष घनश्याम गिरीले बताउनु भयो ।
“बसभित्र चिसोले काँपिरहेका बालबालिका, घण्टौँदेखि गन्तव्य नपुगेका यात्रु र सडकमै रोकिएका मालवाहक सवारीहरूले दाउन्ने देखि दुम्कीवास सम्मकै अवस्था अझै कष्टकर बनेको छ”,उहाँले भन्नु भयो ।
यसैबिच आयोजनाले आज सूचना जारी गर्दै अत्यावश्यक बाहेकका सवारी साधनलाई वैकल्पिक सडक प्रयोग गर्न अनुरोध गरेको छ । दाउन्ने खण्डमा एकातिर सडक निर्माण र मर्मतको काम, अर्कोतिर शीतलहरले सडक हिलाम्य बनेपछि सवारी सञ्चालनमा गम्भीर समस्या देखिएको आयोजनाको भनाइ छ । साथै सवारी सञ्चालन गर्दा ट्राफिक नियमको पूर्ण पालना गर्न र सावधानी अपनाउन पनि आग्रह गरिएको छ ।
