फेसबुकमा पछ्याउनुहोस्
विष्णु गौडेल,मध्यविन्दु(नवलपरासी), १६ पुस,(रासस)
गत सोमबार देखि अवरुद्ध रहेको नारायणगढ–बुटवल सडक खण्ड अन्तर्गत दाउन्ने क्षेत्र अझै सुचारु हुन सकेको छैन् । सित लहरले दाउन्ने सडक चिप्लो हुँदा सवारी सञ्चालन हुन नसकेर अवरुद्ध भएको सडक अझ सहज हनु नसकेको हो ।
दाउन्ने स्थित खुर्सानी खोला आसपासको सडकमा सवारी साधन चिप्लिने र उकालो चढ्न नसक्ने समस्या देखिएपछि सोमबार बिहान देखि यस खण्ड अस्तव्यस्त वनेको जिल्ला प्रहरी कार्यालय नवलपरासी(बर्दघाट सुस्तापूर्व)का प्रहरी उपरीक्षक युवराज खड्काले बताउनु भयो ।
“अहिलेको समस्या दाउन्नेको पश्चिम खण्डमा सित लहरका कारण सडक चिप्लो र हिलो हुँदा सवारी साधन उकालो चढ्न र ओरालो झर्न नसकेर सडक अवरुद्ध भएको हो”, उहाँले भन्नु भयो,“बिस्तारै सवारी पास गराउने काम त भइरहेको छ तर तीन दिन देखि रोकिएका सवारी व्यवस्थापन गर्न कठिन भइरहेको छ ।”
दाउन्नेमा बाक्लो हुस्सु र चिप्लो सडकका कारण सवारी सञ्चालनमा अत्यधिक कठिनाइ भइरहेको जिल्ला ट्राफिक प्रहरी कार्यालय नवलपरासी(बर्दघाट सुस्तापूर्व)का सूचना अधिकारी प्रहरी वरिष्ठ नायब निरीक्षक विनोद जोशीले बताउनु भयो ।
“अहिले पनि दुम्कीवास बजार देखि नै सवारीको जाम कायम रहेको छ”,उहाँले भन्नु भयो,“सडक निर्माणका कारण एक तर्फी रहेको राजमार्गमा लामो समय सवारी जाम हुँदा सुचारु गराउन निकै समस्या भएको छ ।”
नारायणगढ–बुटवल सडक योजना पश्चिम खण्डका सूचना अधिकारी इन्जिनियर विकास खनालले निर्माणाधीन क्षेत्रमा सित लहरको प्रभाव कायम रहेकाले पश्चिम खण्डमा अझ धेरै सवारी चाप रहेको बताउनु भयो ।
“हाल खुर्सानी खोला क्षेत्रमा ग्राभेल हाल्ने काम भइरहेको र अवस्था सहज नहुँदासम्म मालवाहक सवारीलाई बर्दघाट र भुताहा क्षेत्रमा रोकेर राखिएको छ”,उहाँले भन्नु भयो ।
तीन दिन देखि जारी सवारी जामका कारण सयौँ यात्रुहरू अलपत्र परेको छन् । नारायणगढ–बुटवल सडक योजना (पश्चिम खण्ड)ले सूचना जारी गर्दै अत्यावश्यक बाहेकका सवारी साधनलाई वैकल्पिक सडक प्रयोग गर्न अनुरोध गरेको छ । दाउन्ने खण्डमा एकातिर सडक निर्माण र मर्मतको काम, अर्कोतिर शीत लहरले सडक हिलाम्य बनेपछि सवारी सञ्चालनमा गम्भीर समस्या देखिएको आयोजनाको भनाइ छ ।
