फेसबुकमा पछ्याउनुहोस्
विष्णु गौडेल,मध्यविन्दु (नवलपरासी),(रासस)। यातायात व्यवस्था कार्यालय नवलपरासी(बर्दघाट सुस्तापूर्व)ले चालु आर्थिक वर्षको नौ महिनामा २३ करोड ५४ लाख ३० हजार नौ सय ८० रुपैयाँ राजश्व सङ्कलन गरेको छ । चालु आ.व. को साउन देखि चैत मसान्त सम्म सवारीसाधन कर,चालक अनुमति पत्र, सवारी दर्ता लगायतका विभिन्न शीर्षकमा सो राजश्व सङ्कलन भएको कार्यालय प्रमुख सुरेश जैसवालले बताउनु भयो ।
“यो अवधिमा सवारी साधन कर सङ्कलन बापत १९ करोड १२ लाख ३६ हजार आठ सय २०, सवारी चालक अनुमति पत्र एवं सवारी दर्ता किताब बापत चार करोड नौ लाख ५४ हजार छ सय ५५, यातायात क्षेत्रको आम्दानी राजश्व शीर्षकमा २३ लाख ५८ हजार चार सय ६० र अन्य प्रशासनिक सेवा शुल्क बापत आठ लाख ७५ हजार छ सय रुपैयाँ राजश्व सङ्कलन भएको छ”,उहाँले भन्नु भयो ।
यातायात व्यवस्था कार्यालयले कर सङ्कलनलाई व्यवस्थित र प्रभावकारी बनाउन चैत महिनामा विशेष अभियान नै सञ्चालन गरेको कार्यालय प्रमुख जैसवालले बताउनु भयो । यो अभियान अन्तर्गत बिल बुक नवीकरण, जाँच पास, रुट परमिट तथा सवारी चालक अनुमति पत्रको चेकजाँचलाई विशेष प्राथमिकता दिइएको थियो । अभियानको सकारात्मक प्रभावको रूपमा चैत महिनामा मात्र चार करोड ८० लाख २५ हजार छ सय २५ रुपैयाँ राजस्व सङ्कलन भएको उहाँले बताउनु भयो ।
“प्रदेश सरकारले राजस्व वृद्धि गर्ने लक्ष्यसहित कर सङ्कलन प्रक्रियालाई चुस्त–दुरुस्त बनाउन विशेष योजना अघि बढाएको थियो सोही अनुसार राजश्व सङ्कलन पनि वृद्धि भयो”,उहाँले भन्नु भयो,“यातायात सेवालाई नियमित र पारदर्शी बनाउँदै कर सङ्कलनको लागि विभिन्न अभियान सञ्चालन गर्ने गरेका छौ ।”
सेवाग्राहीलाई सहज सेवा प्रदान गर्न यातायात कार्यालयले विशेष व्यवस्था गरेको सूचना अधिकारी टेक नारायण तिवारीले बताउनु भयो । कर तिर्न आउने सेवाग्राहीको भीडलाई व्यवस्थित गर्न अतिरिक्त कर्मचारी खटाइएको तिवारीले जनकारी दिनु भयो ।
“सेवा लिने क्रम छिटो होस् भन्ने उद्देश्यले छुट्टै काउन्टरको व्यवस्था गरिएको छ”उहाँले भन्नु भयो,“कर तिर्दा आवश्यक पर्ने कागजात तथा अन्य जानकारी सहजै उपलब्ध गराउने व्यवस्था मिलाइएको छ ।”
गत आर्थिक वर्ष २०८०/८१ मा यातायात व्यवस्था कार्यालय नवलपरासी(बर्दघाट सुस्तापूर्व)ले ३० करोड ३५ लाख ५३ हजार नौ सय ५३ रुपैयाँ राजश्व सङ्कलन गरेको थियो ।
